బెంగటిల్లిన ఉత్తరం!

బెంగటిల్లిన ఉత్తరం!

----- మామిడి హరికృష్ణ 8008005231

పేరుకు ఉత్తరమే కానీ 

అష్ట దిక్కుల నుండీ 

మనందరినీ కలుపుతున్న వృత్తం ఇది!

ఉత్తరం ఒకప్పుడు నా ఉటోపియా 

ఇప్పుడు ఓ నోస్టాల్జియా 

ఉత్తరం పరిణామ శీలి- నిత్య చైతన్య జావళి 

పేరు మారొచ్చు- రూపు మారొచ్చు 

ఉత్తరానికి జరా మరణాలు లేవు 

ఉత్తరం లేకుండా మన జ్ఞాపకాలు ఉండవు !

ఉత్తరం ఇప్పుడు 

అంతరించిపోతున్న జీవజాలం కాదు 

అవతారం చాలించిన అక్షర దేవత !

పోస్ట్ box నుంచి ఇన్ బాక్స్ లోకి 

రూపాంతరించిన ఆకాశ దూత !

ఉత్తరం -

తాత తరం నుంచి నేటి తరం దాకా 

నిరంతరం ప్రవహిస్తున్న జీవ నది !

తోడుకున్నోళ్లకు తోడుకున్నంత 

జ్ఞాపకాలను ఇచ్చి 

మనసునంతా తడిమేస్తుంది 

కాలాన్ని కన్నీటి చెమ్మతో తడిపేస్తుంది !

ఇప్పటిదాకా ఎందరెందరి బెంగలనో తీర్చిన ఉత్తరం-

ఇన్నాళ్లకు తానే బెంగటిల్లింది 

రాసే చేతులు కరువై- పెన్ను బరువై 

కాగితంపై వాక్యాలూ చెరిగిపోయి 

సిరా ముద్రలు అలుక్కుపోయి 

ఆలోచనలన్నీ గజిబిజియై ఉత్తరం బెంగటిల్లింది!

ఇల్లు ఖాళీ చేసినంత సులువు కాదు కదా 

ఉత్తరాన్ని ఖాళీ చేయడం !

ఏ భావం ఏదో ఏ ఉద్వేగం ఏదో 

తెలీని కొలాజ్ చిత్రంలా 

ఒంటినిండా అక్షరాల నగలను దిగేసుకొని 

గుండె మూసుకుపోయిన మనిషిలా 

ఉత్తరం ఇప్పుడు బెంగటిల్లింది!

ఇప్పుడు ఉత్తరం 

పెన్ను పెదాల చుంబనానికి దూరమై 

తెల్లని అంచుల నడుమన 

ఖాళీ గదిలో బెంగటిల్లి పdi ఉంది!!

3 మార్చి, 2012