చల్తే చల్తే మేరే యే గీత్‌ యాద్‌ రఖ్‌ నా!

hi folks, here its my poem published in PRASTHANAM, august, 2014 issue..

చల్తే చల్తే మేరే యే గీత్‌ యాద్‌ రఖ్‌ నా!

-------మామిడి హరికృష్ణ-9908844222

1.ఏదో ఓ ఘడియన

ఆకులన్నీ చెట్టుకి అల్విదా చెప్పి

భూమి పొరల్లో కన్రెప్పలని వాల్చేసి

మట్టిగా రూపాంతరిస్తాయి

ఆ నిర్దయ నిమిషాన్నే

ఎక్కడో ఏ చెట్టు నీడనో

ఖండిత హృదయం వెక్కి వెక్కి దిగులు పడుతుంది

ఎక్కడో ఏ గోడ చాటునో

ఒక దుఃఖిత నీడ సూర్యున్ని ఆవిరి చేస్తుంది

ఎక్కడో ఏ వాడ మలుపునో

ఒక అవాంచిత అడుగు జాడ సముద్రాన్ని దిగమింగుతుంది

ఎక్కడో ఏ మేడ మెట్లనో

ఒక అస్ఖలిత జ్ఞాపకం జారిపడి తల బద్దలు చేసుకుంటుంది

ఎక్కడో ఏ ఎడారి తీరాన్నో

ఒక జ్వలిత గాయం ఇసుక తుఫానై సుళ్ళు తిరుగుతుంది

2.ఏదో ఒక ఘడియన

చినుకులన్నీ మబ్బులకి అల్విదా చెప్పి

గాలి జారుడుబండలోంచి

నేల పైకి దూకేస్తాయి

ఆ దయార్ద్ర సమయాన్నే

ఎక్కడో ఏ తడారిన గొంతుల్లోనో

ఒక వ్యధిత స్వరం పాటై ఎగురుతుంది

ఎక్కడో ఏ శిశిర కొమ్మ కళ్ళలోనో

ఒక వసంత పుష్పం పల్లవిస్తుంది

ఎక్కడో ఏ క్షతగాత్ర యుద్ధ భూమిలోనో

ఒక నిశాంత శాంతి వెన్నెలలా కురుస్తుంది

ఎక్కడో ఏ బెంగపడిన గుండెల్లోనో

ఒక హరిత స్పందన కొత్త జీవితమై పుడుతుంది

3.చల్తే చల్తే మేరే యే గీత్‌ యాద్‌ రఖ్‌ నా

ఇరు ఘడియల అంచుల దాకా వ్యాపించిన కాలం

నువ్వు

రెండు అల్విదా ల మధ్య పెండ్యులం

నేను...... !